CEBU, Philippines — Hinay-hinay na og siga ang mga suga sa Cebu South Coastal Road (CSCR) sa Dakbayan sa Talisay.
Nabantayan nga sa katapusang buwan sa Hunyo misiga na ang pipila ka habig sa Barangay Tanke, gani karon naa na sa pito ngadto sa 10 ka poste ang nagsiga.
Una niini, si Talisay City mayor Gerald Anthony “Samsam” Gullas nihangyo sa taga Department of Public Works and Highways (DPWH) labot sa pagpasiga sa mga suga sa CSCR gumikan sa kangit-ngit matag gabii.
Ang konseho sa siyudaad nipalabang sab og resolusyon niini ngadto sa DPWH tungod kay peligro sa pagbiyahe nga ngitngit ang dalan.
Daghan sab sa mga netizen ang nahimuot nga natagad na gyud ang suliran sa suga sa dapit diin daghan nga motorista ang mag agian.
Sa dili madugay mataod na ang tanang suga sa kutay sa CSCR hangtud sa Barangay Lawaan 1. (BANAT NEWS)