CEBU, Philippines — Anha na pasubayon sa outer lane sa Cebu South Coastal Road (CSCR) ang mga motorsiklo sugod niadtong miaging mga adlaw.
Ang mga enforcers nga naa diha sa matag intersection nibutang og megaphone diin matag karon og unya moanunsyo alang sa pagpahibawo sa nagmotorsiklo nga diha ra mosubay sa outer lane ug dili magtipas-tipas og lane.
Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga ilang naobserbahan nga ang disgrasya sa motorsiklo tungod sa pagbalhin-balhin og lane.
Sa ilang talaan, 20 porsyento ang pagsaka sa disgrasya diha sa major road gikan sa buwan sa Enero hangtud sa Hunyo kung ikumpara kini sa miaging tuig.
Sa 2,200 nga natala nga disgrasya sa dalan ang 60 porsyento niini naglambigit sa motorsiklo.
Pahugtan sa CT-TODA ang balaod alang sa pagsubay sa saktong lane samtang kadtong mga sakyanan anha sa middle o inner lane pasubayon.
Dugang pa ni Tumulak nga ang di motuman sa ilang gipatuman nga lagda maisyuhan og citation ticket. (BANAT NEWS)