Bantayan Bay gibuksan og balik kagahapon

CEBU, Philippines — Hingpit na nga gibuksan og balik sa lokal nga kagamhanan sa Lungsod sa Cordova ang Bantayan Bay ngadto sa publiko kagahapon.

Si Mayor Cesar "Didoy" Suan maoy nangunay sa pagbukas og balik sa maong  public beach human sa pipila ka bulan nga kini gisirad-an tungod sa kahugawa na sa tubig.

Gitataw ni Suan nga ang pag-abli og balik sa Bantayan Bay temporaryo lang una.

"Number one, ato pa ning develop-pon aron mas mo nindot pa unya atong Bantayan Bay, but tungod sa kadaghan naman gud sa gusto na maligo", matud sa mayor kinsa nidugang nga iyaha usab nga nakita nga apektado na ang nga bangkero sa pagsirado sa maong public beach.

Awhag karon ni Suan sa mga bangkero nga motabang sa kagamhanan nga magbantay sa mga mangaligo nga magpasagad lang og labay sa basura o hugaw aron dili masubli ang nahitabo kaniadto nga gipasirad-an ang Bantayan Bay tungod sa grabeng kahugaw na niini nga makaapekto na panglawas sa tawo. Si Suan uban sa opisyales nga gilangkuban nila ni Vice Mayor Boyet Tago, Municipal Consultant Marven Pañares, Cordova Market Administrator Allan Tiro, MDRRMO OIC Fred Anlocotan ug Cordova Marine Watch OIC Rogelio Saquilabon nipahigayon sa "ceremonial swim" pagmatuod nga limpiyo ug luwas kini kaligoan sa publiko.

Sa pagbukas niini og balik gitugotan ang mga ambulant vendors nga makabalik usab og paninda lakip na ang mga boat operators apan walay floating cottages nga gitugot nga makatukod ug maka-operate og balik nga maoy unang gitumbok nga hinungdan nga taas presensiya sa coliform bacteria diha sa dagat.

Ang LGU sa Cordova nipahibalo na usab daan sa mga angay timan-an sa mga gusto maligo diha sa Bantayan Bay.

Matud sa LGU nga walay bayad ang pagsulod o free ang entrance sa Bantayan Bay ni bisan kinsa; ikaduha bisan walay entrance fee aduna gihapon kini ecological fee o maintenance free hinuon wala pa kini gipatuman kagahapon ug ianunsiyo kini sa LGU kanos-a sugdan ug pila ang singil sa maong bayranan.

Gidili sa maong public beach ang pagdala og mga ilimnong makahubog, paggamit og glass container, panigarilyo, pag-park sa mga "unauthorized" nga sakyanan, dili otorisado nga nga camping o overnight stay; pagpatukar og kusog o saba kaayo nga music; pagsugal ug pagdala og armas.

Ang Bantayan Bay abli ngadto sa publiko gikan alas 5:00 sa buntag hangtud sa alas 5:00 sa hapon. —/BDB (BANAT NEWS)