CEBU, Philippines — Patay ang usa ka konsehal human mibangga iyahang gimanehong motor sa road barrier samtang siya nagsubay sa karsada sa Sibonga padung Dumanjug diha sa Barangay Gugoan niadtong Sabado sa gabii, Hulyo 15,2023.
Ang nakalas mao si Wilson Ortiz Antiquina, 38, minyo, residente ug konsehal sa Barangay Dugoan lungsod sa Sibonga.
Sumala sa inisyal nga imbestigasyun sa Sibonga Police Station nga pasado mga alas-8 sa gabii nahitabo ang aksidente.
Matud pa nga gamaneho si Antiquina sa iyahang motorsiklo gikan sa Brgy Cantularoy sa lungsod sa Sibonga apan pag-abot sa Brgy. Dugoan aksidente niini nga nabanggaan ang road barrier nga giali sa padayong gitrabahong bahin sa karsada sa maong dapit.
Tungod sa kakusog sa pagbangga, nalagpot kini ug nabunal sa sementadong dalan ang ulo ug nakaangkon kini og daghang mga samad sa kalawasan.
Daling gidala si Antiquina sa Deiparine Community Hospital sa mga nirespondeng personnel sa Municipal Disaster Risk Reduction and Management Office (MDRRMO) sa Sibonga apan giingong nakabsan kini sa kinabuhi matud pa sa attending physician nga si Dr. Anthony P. Arcenas. — Dannahli Pogado CNU Interns/IBM (BANAT NEWS)