CEBU, Philippines — Makatagamtan og g P0.61/kWh nga pagkunhod sa bayranan sa kuryente ang mga konsumidor sa Visayan Electric sa buwan sa Hulyo hangtod Agosto tungod sa pagkunhod sa presyo sa coal sa world market ug sa presyo sa kuryente sa Wholesale Electricity Spot Market (WESM). Gikan sa P13.72/kWh sa miaging bulan ang pagkunhod nagdala sa kasagaran nga residential rate ngadto sa P13.11/kWh nga nagpasabot nga ang usa ka panimalay nga mokonsumo og 200 kWh matag bulan makadaginot sa labing menos P122 sa ilang sunod nga bayronon.
Sugod niadtong Mayo mao kini ang ikatulong bulan nga mius-os ang residential rates sa mga kustomer sa Visayan Electric human sa gamay nga pagsaka sa P0.03 sentimos sa residential rates niadtong Abril.
Atol sa pagtaas sa presyo sa gasolina sa ikaduhang kwarter sa 2022, ang residensyal nga bayranan sa kuryente misaka hangtod sa P16.40/kWh niadtong Nobiyembre apan nakasinati na og pag-us-os karong mi-stabilize na ang presyo sa gasolina ug coal sa merkado sa kalibotan. Gipasabot sa Visayan Electric nga ang nag-unang makapadako sa konsumo sa kuryente mao ang temperatura ilabina kun init ang panahon, daghan ang mag aircon ug electric fan. Apan si Visayan Electric President ug COO Raul Lucero, nipahinumdom sa mga konsumidor nga magmatngon gihapon sa ilang konsumo sa kuryente karon nga mibugnaw na ang panahon.