Nag-inom napunggit sa minibus

CEBU, Philippines — Pito ka tawo ang naangol human midasmag ang minibus sa usa ka balay sa daplin sa karsada Lunes sa kaadlawon, Hulyo 10, diha sa Diversion Road, sa Sitio Cogon, Brgy Poblacion 1 sa dakbayan sa Carcar.

Ang mga nangaangol mao sila Rey Ybañez, 27, Vivian Abella, 57, Martie Barangan, 18, Johnar Ybañez, 23, Jundy Barbieros, 26,  Bon Roland Miñoza, 26, ug Warren Plarisan, 31 nga pulos taga dakbayan sa Carcar.

Giingong naatlan nga nag-inom ang mga biktima sa maong tindahan atol nga nahitabo ang pagbangga.

Samtang ang drayber nga nakabangga kanila mao si Argey Sevellino Ogahayon, residente sa Pinamungahan nga maoy gamaneho sa usa ka yellow nga minibus.

Sumala pa sa taho sa mirespondeng si Police Corporal Jerome Palao nga gikan ang maong sakyanan sa Pinamungahan paingon sa dakbayan sa Sugbo.

Apan pagabot sa maong dapit nawad-an og kontrol sa manobela si Ogahayon sa dihang moliko unta kini patuo. Matud pa dunay motor nga kalit sab miliko diha sa atubangan niini maong gikabig niya ang manobela aron kini lihayan apan didto siya napunta sa nanag-inom daplin sa karsada lahus sa balay.

Ang mga nag-inom nakaangkon og daghang nagkadaiyang samad sa lawas ug gidala sa Cebu Provincial Hospital sa Carcar alang sa dinaliang tambal.

Ang balay nga napunggit sa sakyanan nagbilin og gibanabanang danyos nga P50,000 hangtod P70,000. Gikatahong motabang hinoon ang kompanya niini sa danyos ug balayrunon sa tambalanan.

Natingkagol na ang suspetsado sa Carcar City Police Station ug pasakaan sa kasong Reckless Imprudence Resulting to Multiple Physical Injury and Damage of Property. — Jhayrei Pintac, Romeo Marantal (BANAT NEWS)