CEBU, Philippines — Si kanhi senador ug Department of Tourism secretary Richard Gordon nasagmuyo sa plano sa National Museum nga tangtangon ang monyumento ni Lapulapu didto sa Luneta Park.
Matud ni Gordon atol sa press conference kagahapon pinaagi sa Zoom nga ang P30 milyones nga monyumento nga gipatindog dihang siya pa ang DOT secretary niadtong tuig 2004 usa ka gasa sa Koreans pinaagi sa Korean Freedom League nga nagpadayag sa ilang pagdayeg sa katawhang Pilipino nga nakig-away ug namatay sa ilang pakigbisog alang sa demokrasiya.
Sa sayong bahin sa tuig 2005, ang Lapulapu Monument o nailhan usab nga “Sentinel of Freedom” gibuksan didto sa national park sa Luneta uban ni kanhi senate president Franklin Drilon, kanhi senador Edgardo Angara, Republic of Korea Consul General Shin Gil- Sou, Cebu Governor Gwendolyn Garcia, ug ubang kadagkoan.
Matud usab ni Gordon nga si Lapulapu nga gikan sa Kabisay-an ug Mindanao ug si Jose Rizal nga gikan sa Luzon dili mabulag sa national park diin ang nahimutangan karon sa monyumento ni Lapulapu gikonsiderar ug tinuyo nga gipili.
Nisamot ang kasagmuyo ni Gordon sa pangangkon sa direktor heneral sa National Museum nga si Jeremy Barns nga ang monyumento huyang na ang istraktura niini gumikan sa pagka-expose ngadto sa mga elemento.
Si Gordon nagkanayon nga adunay balaod nga ang monyumento ni Lapulapu dili matangtangan sa nahimutangan niini karon.
Ang Lapulapu Monument nasakop kini sa iyang nahimutangan karon ug kong tangtangon kini mawala ang simbolo nga diwa sa kabayanihan gikan sa Luzon, Visayas ug Mindanao.
Ang Lapulapu Monument ug ang nahimutangan niini maoy simbolo sa pag-ila sa nasud sa iyang iconic, pioneering ug lunsay nga kabayanihan.
Si Gordon, sa iyang sulat nga pinetsahan og Hulyo 26, 2023 nipahimangno kang Barns nga likayan ang dugang kadaot sa estatuwa.
Si Gordon nagkanayon nga kini dili lang mahitungod sa usa ka monyumento ug sa nahimutangan niini apan mahitungod kini sa pagpadayon sa pagpasidungog sa labing unang nailhan nga patriot ug manggugubat sa kagawasan sa atong nasud.
Samtang si Barns, sa iyang sulat ngadto kang Gordon nagkanayon nga “the careful and professional dismantling of the monument, is programmed to commence imminently this month”. — /BDB (BANAT NEWS)