Karnaper nga tulisan, nangayo’g tabang

CEBU, Philippines —  Gidudahang karnaper nga tulisan, nangayo og tabang nadakpan na hinuon sa polis nga iyang gidangpan.

Ang pagkasikop sa suspek nga si Barkley Labrador Caparida, 25, taga Sitio Lagang, Bolinawan, Carcar City, nagsugod sa dihang gikatahong iyang giilogan og motosiklo si Sheena May Paquilit Villamore, 32, taga Talaytay, Argao.

Matud pa sa biktima ngadto sa kapolisan, samtang siyang nagmaneho sa iyang Honda Click alas-11 sa gabii niadtong Hulyo 6, 2023 diha sa Barangay Langtad sa Dakbayan sa Naga, kalit kining gisikitan sa suspek nga luwan sab og Honda Wave nga motor ug diretso siyang gitionan og armas.

Sa karatol sa biktima, iyang nadasmagan ang suspek ug silang duha nangatumba. Dali-daling mibarog ang suspek ug pugsanong giilog ang motor ni Villamore ug mipasutoy palayo padung sa direksyon sa Naga.

Ang biktima nagpatabang sa mga polis sa Argao hinungdan sa gilusad nga hot pursuit operation. Paglabay sa pipila ka minutos,  usa ka Jane Repollo Tapao ,23,  ang gitulis sa lalaking nagmotor diha sa Tuyan Naga City.

Matud pa samtang nagbaktas kini pauli, gibabagan siya sa lalaking kaparehas og diskripsyon sa miilog sa motor ni Villamore sa Argao ug gitulis kini ug gikuha iyang cellphone.

Tungod niini, naghiusa ang kapolisan sa Argao ug Naga sa pagpangita sa suspek kinsa nianang tungora misibat na padung sa Minglanilla tungod sa kahadlok nga maabtan.

Pag-abot sa Sitio Sto. Niño sa Tungkil, Minglanilla gikatahong nagpakaaron-ingnon kining maoy biktima ug nangayo og tabang sa mga tawo didto. Ang pasumangil niini, dunay usa ka polis nga nagtinguha sa iyang kinabuhi.

Gidemalas lang ang suspek kay naatol  nga diha sa lugar si Police Corporal Leonard Garrett E. Gako, sakop sa Mandaue City Intelligence Unit nga misukit-sukit kaniya.

Matud pa nagkanga-kanga ug wala magkadimao ang tubag niini maong nagduda si Gako ug gipangitaan og mga dokumento sa iyang motorsiklo , apan wala siyay napakita hinungdan nga gidala siya ngadto sa Minglanilla Police Station.

Didto nahibaw-an nga naalarma na ang pagpangilog og motor sa Argao ug pagpanulis sa Naga ug siya nitakdo sa deskripsyon sa tulisan hasta ang motorsiklong gikarnap.

Sa laing bahin, nakwelyohan sa sakop sa City of Talisay-Traffic Operation Development Authority (CT-TODA) ang 19 anyos nga gipasanginlang notadong esnatser diha sa Barangay Tabunok, Dakbayan sa Talisay niadtong miaging adlaw.

Ang biktima nga si Leo Santos Jr., 23, naglakaw sa maong dapit sa dihang giablihan ni Rarilyn Pat Pepito, 19, ang iyang backpack ug gikuha ang cellphone niini nga nagkantidad og P5 mil.

Apan Naasyagit og panabang ang biktima nga dali sab nadunggan ni Traffic Enforcer Dan Clifford Labara nga nadestino sa lugar ug dali-daling migukod kang Pepito hangtud nga kini naabtan ug nabawi ang cellphone.

Gisubay sa kapolisan sa Talisay ang background sa dinakpan kung naa ba kini grupo sa mga kawatan ang dinakpan.  Gabriel Bonjoc ug Dannahli Pogado CNU Intern, IBM (BANATNEWS)