Market vendors ipatawag aron sutaon ang ilang reklamo

CEBU, Philippines — Human nahinabi ni Konsehal Nestor Archival, Sr. ang mga nagprotesta nga market vendors sa niaging semana, nihimo siya og request sa konseho alang sa usa ka executive session aron hisgotan ang mga yangongo sa mga manindahay.

Ang maong tigom mahitabo karong Hunyo 28 diin ipatawag ang pipila ka mga representante sa Market Operations Division (MOD), ug ang pipila ka grupo sa vendors aron mahatagan og katin-awan ang mga isyu.

Matud pa sa konsehal nga kinahanglan nga madungog ang habig sa mga hingtungdan aron makab-ot ang tukmang solusyon sa problema.

Kahinumdoman nga nihimo og protesta sa niaging semana atubangan sa Cebu City Hall ang mga miyembro sa Carbonhanong Alyansa kinsa nireklamo sa pipila ka mga lagda nga gipàtuman diha sa Carbon.

Nanukad ang mga ang nagprotesta sa Freedom Park ug nag-martsa padulong atubangan sa City Hall.

Sa statement sa ilang grupo, ilang nabatyagan nga nikunhod ang ilang kita tungod sa pagdili sa pagpasulod sa mga sakyanan (public ug private) pinaagi sa pagbutang og yellow railings, orange traffic barriers ug mga karatula nga “NO ENTRY” sa kadalanan sa MC Briones.

Wala usab mahimuot ang maong grupo sanglit gibutang na usab ang mga vendors sa tungâ sa dalan.

Wala usab sila makauyon sa pagpahamtang sa arbitraryong bayranan sama sa 2x2 tent nga mokantidad og P3,500 kun cash ug P4,500 kun installment.

Apil na usab ang bayad nga P20 matag gabii sa kada vendor sa ilang mga banderitas sa mga suga ug 3 ka arko nga tukoron sa entrada sa Manalili, Plaridel, ug F. Gonzales.

Alang kanila, wala gihimo ang feasibility study ug public consultation kun haom o makaayo ba sa mga vendors ug sa kinatibuk-an ang bag-ong desinyo o “pedestrianization” sa Carbon night market. — /MEL (BANAT NEWS)