CAAP miisyu og NOTAM ibabaw sa Kanlaon, Mayon ug Taal

CEBU, Philippines — Mipagawas og advisory ang Civil Aviation Authority of the Philippines sa tanang mga piloto sa paglikay pagpalupad sa ilang abyon 10 mil ka tiil gikan sa baba sa mga Bulkang Mayon sa Bicol, Taal sa Batangas ug Kanlaon sa Negros tungod sa naobserbahan pagsige og bugwak og bagang aso nga posibleng makaapektar kanila.

Ang CAAP mipagawas og notice to airmen (NOTAM) matud pang CAAP spokesperson Eric Apolonio atol sa Laging Handa briefing.

Ang NOTAM ilang giisyu human gipasaka sa Philippine Institute of Volcanology and Seismology (Phivolcs) ang alert levels sa maong mga bulkan niadtong adlaw nga Lunes.

Ang Mayon giisa gikan sa Level 1 ngadto sa Level 2 o “increasing unrest” basi kini sa gidaghanon sa gibugwak nga sulfur ug mga bato gikan mismo sa baba niini.

Namonitor sab sa Phivolcs ang “increased activity” sa Taal Volcano sa Batangas apan gipabilin lang gihapon kini sa alert Level 1 nga nagpasabot “it is still in abnormal condition” ug “sudden steam-driven or phreatic explosions, volcanic earthquakes, minor ashfall and lethal accumulations or expulsions of volcanic gas can occur and threaten areas.”

Samtang ang bulkan dinhi sa Kabisay-an diha sa isla sa Negros nga Kanlaon Volcano nagpabiling ubos sa Alert Level 1 sukad pa niadtong 2020 apan naobserbahan ang pagsaka sa sulfur oxide emission niini sa nakalabay’ng duha ka adlaw  bisan nagpakita lang kini og “low-frequency” nga pagdahunog sa ilawom.

Niadtong Lunes sa alas-5 sa kaadlawon hangtud kagahapon sa alas 5 sa kaadlawon Martes nakatala ang Phivolcs og lima ka volcanic earthquakes sa Kanlaon.

Gipasidan-an sa Philvolcs ang publiko nga likayan ang six-kilometer-radius permanent danger zone sa palibot sa Mayon Volcano aron malikayan ang disgrasya kun pananglit mobuto kini o ba kaha mobugwak og mga bato ug ingon man landslides.

Samtang higpit gyud nga gidid-an ang tanan pagsulod sa four-kilometer permanent danger zone sa Taal ug Kanlaon sumala pa sa advisories sa Phivolcs. — IBM (BANAT NEWS)