CEBU, Philippines — Gibutyag sa Department of Veterinary Medicine and Fisheries DVMF nga misaka ang kaso sa dog bite kun mga napaakan og iro sa milabayng mga buwan.
Suma pa ni Dr. Jessica Maribojoc, ang pangulo sa DVMF nga base sa ilang nahipos nga kasayuran sa City Health Department aduna gayuy pagsaka niini hinungdan nga mipatuman sila og mga pamaagi aron malikayan kini.
Lakip sa ilang himoon mao ang intensive massive vaccination sa mga iro nga maoy ilang stratehiya kun masuta nga adunay high risk sa mga lugar.
Dugang pa ni Maribojoc, base sa iyang nakita sa graph adunay pagtaas sa paak sa iro niadtong buwan sa Pebrero, ug Marso, diin grabe ang nasinati nga kainit sa panahon.
Kadaghanan sa mga napaakan sa iro mga bata ug adunay mga tag-iya diin posibleng na provoke ang mga iro o iring sama sa nahilabtan o napasakitan.
Gipahibawo ni Maribojoc nga ang buhatan sa DVMF mohimo ug information campaign o education campaign diha sa kabarangayan aron ilang masayran kun unsay angay nga himoon aron malikayan nga mapaakan og iro. — MEL (BANAT NEWS)