Pag-euthanasia sa mga iro gioktaba pamasin adunay mosagop
CEBU, Philippines — Ang Department of Veterinary Medicine and Fisheries sa Dakbayan sa Sugbo nioktaba una sa pagpatuman sa euthanasia sa 32 ka iro nga nakuha gikan sa Barangay Adlaon tungod sa pamasin nga aduna pay mosagop sa mga iro.
Wala mahinayon kagahapon ang pagpatay sa mga iro pinaagi sa lethal injection.
Matud ni Dr. Jessica Maribojoc, pangulo sa DVMF nga gilugwayan nila ang kahigayonan nga mabuhi ang mga iro kong aduna pay buot nga mosagop kanila.
Apan kong wala na gayud karong adlaw’ng Lunes dul-an sa 40 ka iro ang papahuwayon na nila sa humane nga pamaagi.
Si Maribojoc nagkanayon nga kadtong adunay kasing-kasing nga mohatag og bag-ong panimalay ug paglaom sa mga iro mahimo nga mobisita diha sa DVMF aron maka- adopt sila og mga iro.
Matud usab ni Maribojoc nga kinahanglan na nilang papahuwayon ang mga iro nga dili masagop aron mahunong na ang ilang pag-antos ilabi na kadtong mga nagmasakiton.
Sa kinatibuk-an 102 ka iro sa Adlaon ang na-rescue diin 29 niini ang nangamatay tungod sa kaluya ug balatian.
Gipadayag ni Maribojoc nga ang DVMF dili rescue center usa kini ka dog pound diin ang mandato nila mao ang pagpakgang sa pagkuyanap sa rabies hinungdan nga mohimo sila og mga lakang lakip niini ang mercy killing. - Sanden J. Anadia, BDB (BANATNEWS)
- Latest
