DMDP nagsugod na sa enrollment alang sa dugang batch
CEBU, Philippines — Gipahibalo sa Department of Manpower Development and Placement nga gisugdan na nila ang enrollment alang sa dugang batch sa ikatulong hugna sa pipila ka mga kurso nga ilang gitanyag.
Base sa ilang advisory, ang gitanyag nila nga mga kurso sa karong hugna mao ang housekeeping, culinary, food and beverage services, cosmetology, plumbing, computer literacy, dress making ug advance fashion.
Ang mga instresado sa maong programa giawhag nga moduaw diha sa ilang buhatan sa DMDP sa Ramos Public Market.
Nasayran nga gipasigarbo sa maong departamento ang ilang mga programa tungod kay mahimo kining instrumento nga makabaton og maayong oportunidad sa panarbaho ang ilang mga tinun-an.
Sa laing bahin, nagpadayon usab ang pagtuyok sa DMDP sa nagkadaiyang barangay alang sa paghigayon og mga "barangay job fair".
Tumong niini nga direkta nga mahatud ngadto sa katawhan ang impormasyon kalabot sa mga bakante nga trabaho.
Kasagaran niini mga kompaniya sa BPO, hotel, mall, supermarket ug uban pa. Sa nilabay’ng mga buwan si Cebu City Mayor Michael Rama nimando sa pag-level up pa sa mga job fair nga dumalaon sa kagamahanan sa Siyudad sa Sugbo. (BANAT NEWS)
- Latest
