CEBU, Philippines — Nanghipos na sa mga kagamitan diha sa evacuation centers ang kagamhanan sa Dakbayan sa Talisay.
Kini human hinay-hinay na nga Nipalayo ang bagyong Betty.
Si Mayor Gerald Anthony “Samsam” Gullas, Jr. nipasabot nga nihimo sila sa agresibo nga pagresponde dihang nagpadong ang bagyong Betty (international name: Mawar).
Nagkanayon si Gullas nga mas maayong mangandam kaysa diha pa mangandam nga naigo na sa katalagman.
Ang 22 ka barangay sa Dakbayan sa Talisay nipreparar og primary ug secondary nga evacuation area uban sa taga City Disaster Risk Reduction and Management Office (CDRRMO), City Social Welfare and Development (CSWD) ug sa tanang sektor.
Nakatala ang Dakbayan sa Talisay og 57 ka pamilya nga nipasilong sa evacuation center gikan niadtong Biyernes hangtud sa Domingo tungod sa hinungaw sa bagyo.
“Kini tanan atoang gihimo bisan paman og wala ta maigo directly kay mas maayo nang maghinubra ta’g pangandam kaysa ulahi natang mangamdam”, matud ni Gullas.
Gipahibawo ni Gullas nga ang gobiyerno dili mopasagad ngadto sa mga Talisaynon diin ang bagyong Odette kaniadto maoy nagsilbing sumbanan. (BANAT NEWS)