CEBU, Philippines — Kapin sa 30 ka iro gikan sa giabandonar nga shelter sa Barangay Adlaon, Dakbayan sa Sugbo ang ipaubos sa humane nga pagpatay aron dili na kini mag-antos tungod sa sobrang kaluya ug hulga sa pagkatap sa rabies.
Sa kapin sa usa ka gatus ka iro nga na-rescue aduna nay 27 ang nakalas human wala na makaagwanta ug nangamatay na gumikan sa kaluya.
Matud sa pangulo sa Department of Veterinary Medicine and Fisheries Dr. Jessica Maribojoc nga nagkahigos ang panglawas sa mga iro tungod sa mga nagkadaiyang rason sama sa stress ug mga gihambin nila nga balatian.
Giingong niabot ngadto sa 32 ka iro ang ipaubos sa humane nga paagi sa pagpahuway kanila.
Ang nahisgutang mga iro ipaubos kini sa lethal injection.
Gibutyag ni Maribojoc nga adunay tulo ka iro gikan sa shelter ang na-adopt na ug adunay laing lima nga mahimo nang ma-adopt ug nangita sila og mga mahiligon ug adunay dakong gugma sa mga kahayopan sama sa iro mo adopt niini ug hatagan nila og bag-ong panimalay.
Matud usab ni Maribojoc nga nakig-alayon na sa kanila ang tag-iya sa maong shelter ug tungod sa depression hinungdan iyaha kining gi-turn-over ang maong facility ug wala kini masayod nga mao na diay kini ang kahimtang.
Karong adlawa aduna sila’y ipahigayon nga clarificatory conference uban ang pnagulo sa CDRRMO Harold Alcontin diin andam usab nga motambong ang tag-iya sa shelter aron mopatin-aw sa iyahang habig.
Sa maong clarificatory conference ang resulta niini iduso nila sa buhatan sa City Legal ug mao na kini unya ang mopasang-at sa tukma nga kaso ubos sa Animal Welfare Act.
Sayo pa, si Cebu City Mayor Michael Rama desidido nga pasakaan og tukmang kaso ang mga angayan nga kasohan kalabot sa kahimtang sa mga iro nga gipasagdan lang ug daghan ang nangamatay. – BDB (BANATNEWS)