Food Security Summit gilusad sa Dakbayan sa Sugbo

CEBU, Philippines — Gilusad na kagahapon ang labing una nga Food Security Summit sa kagamhanan sa Siyudad sa Sugbo diin naghugpong ang grupo sa mga mag-uuma, non-government organizations ug ubang stakeholders aron mamintinar ang seguridad sa pagkaon.

Suma pa ni Konsehal Pastor Jun Alcover, chairman sa committee on agriculture sa konseho nga importante kaayo ang pagtuki sa food security aron maseguro nga dili magutman ang katawhan.

“Nagkadaghan ang mangaon, pero nagkagamay ang mga nag-produce og pagkaon. Mao na nga ato gyud nga ipaneguro nga dili maabot sa punto nga managhan ang gipang-gutom”. Suma pa ni Alcover atol sa kalihukan diha sa Plaza Sugbo Grounds.     

Gihimo usab ang pagplastada sa mga pagkaon atubangan sa City Hall nga nag-feature sa nagkadaiyang produkto sa dakbayan sama sa lechon, siomai, itlog, chorizo de Cebu, Chicharon, ham, utanon prutas ug uban pa nga agri products.

Ang pagplastada sa maong mga produkto molungtad hangtud sa Mayo 26.

Samtang tinguha ni Alcover nga mohimo og scholarship program alang sa kabatan-onan nga mokuha og kurso nga dunay koneksyon sa agrikultura diin usa kini sa pamaagi aron dili mohubas ang mga producer og pagkaon.

Gikampanya usab sa konsehal ang urban gardening aron duna pu’y tinubdan sa pagkaon ang matag pamilya.

Magsilbing ehemplo alang sa maong lakang mao ang mga empleyado sa City Hall nga iyang giawhag nga mananom ilabi na kadtong mga utanon nga dili kaayo manginahanglan og dakong lugar.

Sa laing bahin, inay nga kwarta, bugas maoy tabang karon sa Probinsya sa Sugbo ngadto sa matag women’s organization sa barangay level pinaagi sa Bugasan sa Kababayen-an sa Barangay program.

Ang “Bugasan” nahimo na nga programa sa administrasyon ni Gobernador Gwendolyn Garcia niadtong 2010 nga gitumong aron matabangan ang kababayen an sa lalawigan pinaagi sa paghatag og kahigayonan nga makasugod og ginagmay nga negosyo.

Ang mga women’s organizations gihatagan sa Kapitolyo og initial capital nga napulo (10) ka sako nga bugas nga mamahimong ibaligya ngadto sa mga member households.

Hatagan usab sila og fiscal ug small business management trainings aron mapalambo ang ilang negosyo sa bugas. -  Le Phyllis F. Antojado, MEL  (BANATNEWS)