Tag-iya sa dog shelter sa Adlaon gipangita
CEBU, Philippines — Gipalapdan og maayo ang pagpangita sa tag-iya sa dili rehistrado nga dog shelter sa Barangay Adlaon sa bukirong bahin sa Cebu City tungod sa pipila ka mga kalapasan ubos sa Animal Welfare Act ug Anti-Rabies Act ug uban pang posibleng civil liabilities niini.
Suma pa sa usa sa mga special assistant ni Mayor Michael Rama nga usa ka ginganlan og Lorna Maano Oberes ang tag-iya sa maong dog shelter.
Matud pa sa pangulo sa Department of Veterinary Medicine and Fisheries (DVMF) nga si Dr. Jessica Maribojoc nga aduna pa sila’y i-verify sanglit ang maong property nigamit og pangalan sa usa ka kompanya ug dili ubos ni Oberes.
Si Maribojoc miingon nga ang maong dog shelter dili rehistrado sa Bureau of the Animal Industry (BAI), nga unta ang mga sama niini kinahanglang rehistrado sa BAI.
“Personal to na rescue (shelter) niya..Wala gani mi kabalo and nakaila sa iyaha..Kani man gung mga rescuers magkaila ra and nakabalo ta kinsa ni sila..Maong nangutana ko kinsay nakaila niya.”suma pa ni Maribojoc .
Kahinumdoman nga mokabat sa 101 ka iro ang na-rescue ug laing pito ka iro ang napalgang patay atol sa rescue operation sa maong dapit dihang usa ka barangay kagawad sa dapit ang mibutyag mahitungod sa maong giabandonar nga mga iro. Pipila ka bulan ang milabay, gikatahong dunay mga iro gikan sa shelter ang mipaak og mga karnero sa kasikbit nga luna.
Matud pa nagkantidad og tunga sa milyon ka pesos ang mga karnerong gipamaak maong mireklamo ang tagiya sa barangay apan wala gyud mopatim-aw ang tagiya sa shelter.
Bisan matud pa ang caretaker wala na makadawat sa iyang suholan mao nga wala na siya mobalik og duty kapin na sa usa ka semana ang nilabay.
Gimandoan ni Mayor Michael Rama ang mga hingtungdan nga departamento nga gukdon ang tag-iya sa dog shelter aron kini kasohan.
“Kung kami sa DVMF amo gyud to siyang gukdon..Gina-trace pa namo kung asa na siya kay kanang property dili sa name niya nakabutang but sa company..Amo pang gi-investigate,”suma pa ni Maribojoc. (BANAT NEWS)
- Latest
