CEBU, Philippines — Wala nay kinabuhi nga napalgan ang usa ka barangay health worker human kini naanod dihang nitabok sa suba uban sa iyang apo niadtong Martes sa hapon diha sa sitio Langub, Barangay Uling, Dakbayan sa Naga.
Ang patay’ng lawas ni Maria Dolores Seguisabal, 64-anyos, BHW sa Barangay Uling napalgan sa mga rescuer diha sa Sitio Sayaw, Barangay Balirong sa maong siyudad niana nang pagkaabii sa nahisgutang adlaw.
Matud ni Police Lieutenant Colonel William Homoc, hepe sa Naga City Police Station nga ang biktima kuyog sa apo niini nga nilabang sa suba mga alas 4:40 sa hapon apan nadala kini sa kusog nga bul-og sa tubig tungod sa kusog nga ulan sa bukid.
Si Dolores nakahimo pa sa pagluwas sa iyang apo pinaagi sa pagtukmod ngadto sa tampi sa suba apan wala niya masalbar ang iyang kaugalingon.
Ang mga rescuer sa City of Naga Disaster Risk Reduction dali nga niresponde ug nipahigayon dayon og operasyon human kini makadawat og taho kabahin sa maong insidente.
Ang kapolisan sa siyudad nagkanayon nga ilang nasayran nga ala 1:00 palang sa hapon nag-uwan na diha sa bukid hinungdan sa pagsaka sa tubig sa sapa ug ang biktima padulong kini nga mopauli sa ilang balay dihang nahitabo ang maong insidente.
Niadtong Martes sa hapon ang mga kabanay sa biktima nangayo kini og tabang pinaagi sa ilang post sa social media diin giapil nila og post ang hulagway ni Dolores. — BDB (BANATNEWS)