CEBU, Philippines — Gipahibalo sa Cebu City Transportation Office nga ilang giuswag ang plano nila nga “one way scheme” sa tulo ka flyovers dinhi sa Dakbayan sa Sugbo nga ipatuman unta sugod karong adlawa, Mayo 8, 2023.
Tumong niini ang pagpangita pa og laing scheme alang sa pagkab-ot og solusyon sa problema sa Banilad-Talamban road.
Sa mensahe sa CCTO pinaagi sa ilang Facebook Page nahisgotan nila nga ilang gikonsiderar ang gitawag nga “constructive comments “ atol sa adlaw nga ilang gianunsyo ang traffic advisory kalabot sa giplano nga unang scheme.
Ang Cebu City Traffic Management Coordination (TMC) Board ug CCTO kay nagpasalamat usab sa ubang inputs nga ilang nadawat .
Kahinumdoman nga usa ka eksperimento ang maong traffic scheme kun diin ang tumong unta mao ang pagsuta kun usaon pagpaluag sa dagan sa trapiko sa Banilad -Talamban Area.
Ang output unta niini kay mahimong basehan sa sunod nga mga pamaagi nga ilang pagahimoon alang sa pagpalambo sa paghupot sa dagan sa trapiko.
Ang maong wala nauswag nga plano kay maglakip unta sa flyover nga duol sa Ayala, TESDA ug Foodland diha sa Banilad.
Kun nadayon pa, 24/7 unta ang implementasyon sa maong kamandoan kun diin ang mga sakyanan nga padulong sa city capital area sa ubos moagi. Nagmalumon ang maong mga departamento nga makakoha og laing scheme alang sa kalamboan sa dagan sa trapiko sa dakbayan.— /IBM (BANAT NEWS)