CEBU, Philippines — Nipadayag og interes ang Bureau of Jail Management and Penology (BJMP) sa Central Visayas nga moapil sa Sugbusog program sa Probinsya sa Sugbo.
Si Jail Chief Superintendent Neil Avisado, director sa BJMP-7 nagkanayon ngadto kang Gobernador Gwendolyn Garcia nga andam sila nga moadopt sa maong vegetable garden program ug iapil kini sa mga programa ug kalihokan sa ilang mga Persons Deprive of Liberty (PDL) nga anaa sa mga pasilidad sa BJMP sa Probinsya sa Sugbo.
“Gusto din namin sumali sa programa ninyo na Sugbusog kasi may mga tanim din yung mga maliliit namin na garden dun sa facility namin na mga PDL namin, sana makaambag kami sa program din yon” matud ni Avisado.
Sa nasayran nakigtigum si Garcia uban ang mga regional directors ug representante sa mga national government agencies niadtong Abril 26.
Matud ni Avisado andam pud ang BJMP nga direkta mopalit og mga utanon ug ubang produktong agrikultura ngadto sa mga mag-uuma sa mga lungsod kon asa adunay pasilidad sa BJMP.
“Very willing kaming magbili ng produkto nila doon na makonsumo sa PDL namin sa loob…” dugang ni Avisado.
Ang Sugbusog program usa ka vegetable gardening program sa Kapitolyo nga gisugdan niadtong pandemya sa covid-19 aron pagdasig sa mga Sugboanon nga magtanom og mga utanon ug lagutmon sa ilang mga tungkaran alang sa food security.
Ang maong programa gipalapdan pa sa Kapitolyo diin gisagop na usab kini sa mga provincial ug district hospital, eskwelahan ug mga police stations. — MEL ( Banat News )