Radio block timer, pusher sikop

CEBU, Philippines — Gidakop sa kapolisan ang usa ka radio block timer human kini giingong nakuhaan og armas ug drugas atol sa pag-impelementar sa search warrant niadtong Lunes sa gabii diha sa panimalay sa suspetsado sa Purok Mahugani, Barangay Poblacion Ward 2, Lungsod sa Minglanilla.

Ang suspetsado mao si Eric Cañas Pagar alyas “Pagar”, 58-anyos, residente sa nahisgutang lugar.

Si Police Major Arieza Otida, hepe sa kapolisan sa Lungsod sa Minglanilla uban sa iyang mga sakop ang ni-served sa search warrant batok kang Pagar.

Ang maong search warrant giluwatan ni Regional Trial Court (RTC) Judge Dennis Larrobis sa Branch 76 sa Siyudad sa Naga.

Na-recover sa kapolisan gikan sa panimalay ni Pagar ang usa ka kalibre .45 nga pistola nga adunay siyam ka buhing bala, usa ka .9mm nga pistola nga adunay 14 ka buhing bala ug air gun diin pulos kini walay lisensiya.

Gawas niini, na-recover usab sa mga polis ang shabu nga nitimbang og 7.5 gramos nga gibana-bana nga nibalor tanan ngadto sa P51,000.

Ang maong operasyon gitambongan ni Kapitan Kohn Floyd Castañarez, Sk Chairman Junnjel Esmiña, Konsehal Alan Prangoz ug representante sa Department of Justice Julius Figuera.

Ang suspetsado natingkagol karon sa detention cell sa Minglanilla Police Station diin gikatakda kining pasakaan og tukmang kaso sa nahimo niining kalapasan.

Sa laing bahin, nasakmit sa kapolisan sa Presinto 5 sa Lapu-Lapu City Police Office  ang armas ug  shabu gikan sa suspetsadong drug pusher nga ilang  nadakpan atol sa ilang gipahigayon nga buy bust operation sa niaging gabii diha sa Barangay Pusok, Dakbayan sa Lapu-Lapu.

Si Police Captain Jose Roel Nalzaro, deputy chief sa Presinto 5 sa LLCPO niila sa suspetsado nga si Cristopher Booc, 44 -anyos nagpuyo sa maong dapit.

Matud ni Nalzaro nga nakadawat sila og taho kalabot sa ilegal nga kalihokan ni Booc hinungdan nga nipahigayon sila og buy bust batok sa suspetsado.

Nasakmit sa kapolisan gikan sa suspetsado ang shabu nga gibana-banang nikantidad ngadto sa P30,000 ug kalibre .38 nga revolver nga adunay mga bala.  Romeo T. Limpangog, BDB (BANATNEWS)