Mga war veteran gihatagan og importansiya sa VisCom

CEBU, Philippines — Gihatagan og importansiya sa Visayas Command ang war veterans subay sa ika-81st nga anibersaryo sa Araw ng Kagitingan niadtong Abril 9, 2023.

Kagahapon, ang Visayas Command adunay gipahigayon nga kalihokan diha sa Activity Center sa Ayala Center Cebu diin aduna sila'y exhibit nga gihimo nga nagpakita sa mga bayanihong gihimo sa mga beterano sa gubat ingon man mga sundalo nga nagpakita og maayong buhat.

Nitambong sa maong kalihokan ang mga war veterans nga sakop sa Veterans Federation of the Philippines kinsa nalipay gumikan sa paghatag og importansiya sa gobiyerno sa ilang mga sakripisyo aron ang Pilipinas mahimong gawasnon sa mga nagtinguhang mosakop      niini.

Si Sotero Librero, 101-anyos, Japan-US war veteran nipadayag sa iyang kalipay nga gihatagan og importansiya ang ilahang sakripisyo diin matud niya nga ang sundalo ehemplo sa katawhan.

Samtang ang 78-anyos nga Vietnam war veteran Leonardo Batayola nagkanayon nga lab-as pa kaayo sa iyahang panumduman samtang nagsaysay sa iyahang mga kasinatian.

Ang 98-anyos nga si Luciano Wagas nga Japan war veteran nagkanayon nga wala siya'y pangayuon sa gobiyerno apan nasayod ang gobiyerno unsay angay para nilang mga war veteran.

Si Major Joe Patrick Martinez, group commander sa 3rd Civil Relations Group sa Visayas Command nagkanayon nga angay ug matarong lang nga hatagan og pasidungog ang mga World War II veterans ilabi na sa nasud diin gamay nalang sila nga nahibilin tungod kay ang uban nitaliwan na ngadto sa laing kalibutan.

Nunot niini,  gipangulohan ni Mayor Jonas Cortes ang mga kawani sa kagamhanan sa  pagsaulog sa  Araw ng Kagitingan nga gipahigayon diha sa atubangan sa Mandaue  City Hall kagahapon sa buntag.

Kini ilang gihimo isip pagyukbo sa mga bayanihon nga nahimo sa mga Pilipino nga nakigbatok alang sa kagawasan sa nasud. —Romeo T. Limpangog (BANATNEWS)