Direktor sa NOPPO gihulipan

MANILA, Philippines — Human girelibohan si Police Regional Office-7 director Police Brigadier General Jerry Bearis sa bag-ong direktor nga si Police Brigadier General Anthony Aberin,  girelibuhan sa naulahi ang Provincial Director sa Negros Police Provincial Office (NOPPO) nga si Police Colonel Reynaldo Lizardo.

Si Lizardo gihulipan ni Police Col. Alex Recinto isip maoy bag-o karong direktor sa NOPPO ug sakop kini sa PNP Class 1998 ug usa abogado.

Gipahigayon ang turnover ceremony sa Maringa Hall, Camp Lt. Col. Francisco C. Fernandez Jr., Barangay Agan-an, Sibulan, Negros Oriental sayo kagahapon sa buntag pinangunahan mimo ni Aberin.

Si Lizardo milingkod sa katungdanan isip Provincial Director sa Negros Oriental Police Provincial Office sulod sa upat ka buwan.

Kahinumdom nga una nang girelibuhan ang tanang polis sa Bayawan City diin matud pa didto nadakpan ang upat ka mga suspek sa masaker sa Pamplona.

Namatay sa maong masaker si Negros Oriental Gob. Roel Degamo ug walo ka mga tawo ug miangol og kapin 15 ka indibidwal diha mismo sa tugkaran sa panimalay sa gobernador.

Wala pa hinuon  masuta kun ang hinungdan sa pagrelibo kang Bearis ingon man kang Lizardo may kalabutan ba sa maong masaker. (BANAT NEWS)