CEBU, Philippines — Gitukod ang usa ka pederasyon alang sa mga home owners sa mga subdivision sa Dakbayan sa Talisay.
Kini pinaagi sa pag-abag sa City Advisory Council (CAC) pinangulohan ni Cyril Velasco human ilang nakita nga mas maayo nga aduna silay koordinasyon ngadto sa kapolisan.
Si Police Lt. Col. Randy Caballes, hepe sa kapolisan sa Talisay nitataw nga moabot sa 30 ka subdivision ang naa sa Talisay ug naa sab silay nagkalain-lain nga suliran labot sa ilang mga polisiya.
Matud pa ni Caballes nga makatabang kini aron dali nga matubag ang ilang kasungian nga di na mosangpot pa sa krimen.
Lakip na usab dinhi ang ilang koordinasyon sa tagdumala ingon man security officers sa mga subdivision alang sa ilang seguridad.
Nagkanayon si Caballes nga ang pagtinabangay sa matag usa maoy yawe sa malinawon nga pagpuyo.
Dugang pa niya nga sila sa kapolisan andam kanunay nga moabag alang sa kaayohan sa kadaghanan. — /MEL (BANAT NEWS)