Garage sale for a cause gihimo sa dakbayan sa Talisay
CEBU, Philippines — Nagpahigayon og tulo ka adlaw nga garage sale for a cause ang mga empleyado sa Sangguniang Panlungsod sa Dakbayan sa Talisay subay sa kasaulogan sa SP month.
Matud pa ni Atty. Yvonne Gahito nga inay nga mangayo sila og budget para sa kasaulogan sila mismo ang nihimo og paagi nga sila maoy mangita niini aron sab nga ihatag sa nagkinahanglan.
Ilang gihimo mao ang pagpangolekta og nagkalain-laing butang gikan sa mga konsehal, department heads ug sa tanang empleyado sa city hall.
Gikan sa mga appliances hangtud na sa senina ang ilang ibaligya nga ang pinakamahal naa lang sa P300 pesos.
Asoy pa ni Gahito nga tulo ka non-government organization ang ilang benepisyaryo nga mao ang Divine Providence, Our Lady of Sorrows ug Missionary of the Poor.
Iyang giawhag ang Talisaynon nga mosuroy sa ilang mga baligya kay gawas nga sila nag shopping makatabang pa gyud sila sa isig ka tawo. Si mayor Gerald Anthony “Samsam” Gullas nihangyo sa Talisaynon nga mosuroy aron sa pagpamalit sa mga baligya. — MEL (BANATNEWS)
- Latest
