CEBU, Philippines — Gibutyag ni Police Lt. Col. Ma. Theresa Macatangay, tigpamaba sa Cebu City Police Office(CCPO) nga ugmang adlawa isang-at na ang kasong kalapasan sa Anti-Hazing Law ug Homicide batok sa dili momenus napulo ka mga sakop sa Tau Gamma Phi fraternity tungod sa kamatayon sa marine engineering nga estudyante nga gikatahong namatay sa hazing.
Ang biktimang si Ronnel Baguio, 2nd year sa kursong Marine Engineering sa usa ka unibersidad sa dakbayan sa Sugbo gikatahong aplikante sa maong fraternity ug gipaubos sa hazing dungan sa wala pa matinong gidaghanon sa mga rekrut niadtong Disyembre.
Gipasabot ni Macatangay nga kagahapon unta nila isang-at ang kaso apan gumikan sa laing development nga mitumaw sama sa natultulan nila ang lugar kun asa gihimo ang hazing ug na-identify sab nila ang dugang pang mga suspek sa nahitabo ni Baguio.
Pito na karon ka tawo ang nailhan sa kapulisan, upat pa lang nila ang ni-surrender sa kapulisan nga gustong motabang alang sa kasulbaran sa kaso ni Baguio.
“This was a result of the statement need by the recent witnesses that we had,” sigon niMacatangay.
Dunay meeting nga himoon ang mga imbestigador sa Mambaling Police Station 11 uban ang Public Attorney’s Office(PAO) aron makuha ilang habig kun unsay madugang nila sa maong kaso.
“If everything will be fine today (kagahapon) we will be filing the case tomorrow, we already prepared the cases, the documents ready for filing, we just want to make sure that everything is covered,” ni Macatangay pa. (BANATNEWS)