CEBU, Philippines — Nakakuha og duha ka pasidungog ang Cebu Cordova Link Expressway Corporation (CCLEC) atol sa gipahigayong “58th Anvil Awards Gabi ng Parangal” niining ulahi lang nga gipahigayon didto sa kaulohan.
Kini ang labing unang higayon sa CCLEC nga nisalmot sa prestihiyosong award alang sa talagsaong mga programa sa public relations.
Ang kinatibuk-ang kampaniya sa komunikasyon sa CCLEC nga nagpaila sa 8.9 ka kilometro nga Cebu-Cordova Link Expressway (CCLEX) gihatagan og Gold Anvil.
Gipaila sa kampaniya ang CCLEC isip toll facility ug gidawat kini sa mga motorista sa Sugbo pinaagi sa paggamit sa digital, out-of-home, ug traditional communication tools.
Ang paggamit sa CCLEC sa social media aron ipasiugda ang mga benepisyo sa paggamit sa expressway giila nga adunay Silver Anvil.
“It is our team’s first time to join the Anvil Awards and we are extremely grateful for having received these recognition and honor. These also drive and challenge us to not only continue implementing campaigns that promote our modern and iconic expressway but also execute programs that are relevant to our motorists”, matud sa president ug general manager sa maong kompaniya nga si Allan Alfon.
Ang Anvil Award nga gipresentar matag tuig sa Public Relations Society of the Philippines gihatag ngadto sa talagsaong mga programa sa public relations, mga kampaniya, ug mga kahimanan.
Ang CCLEX giablihan sa publiko niadtong buwan sa Abril sa niaging tuig mao ang unang toll road gawas sa Luzon.
Nagsilbi usab kini nga toll road arm sa Metro Pacific Investments Corporation (MPIC), usa ka inila nga infrastructure holding company ug miyembro sa MVP Group of Companies. (BANAT NEWS)