CEBU, Philippines — Ipaubos sa stress de briefing ang 18 anyos nga dalaga kinsa giingong gikumot ang dughan ug gisuwayan og hawok sa usa ka lalaki didto sa Barangay Guadalupe, siyudad sa Carcar.
Si Police Lt. Col. Ardeolito Cabagnot, hepe sa kapolisan sa siyudad niingon nga na trauma ang batan-on gumikan sa panghitabo ug wa na kini mitungha sa ilang tunghaan.
Matud pa ni Cabagnot nga nakig-alayon na sila sa City Social Welfare and Services (CSWS) aron ipaagi sa proseso ang batan-on.
Una niini, ang biktima nag atang og kasakyan paingon sa iyang tunghaan sa dihang gihunongan sa suspek nga si Romualdo Gemillan, 47 anyos nga taga lungsod sa Barili.
Nitanyag ang suspek nga mohatud sa dalaga ug tuod man nisakay ang biktima.
Apan sa pagnaog niini sa motorsiklo giingon nga nikumot ang suspek sa dughan sa biktima ug misuway pa sa paghawok.
Nisulod sa tunghaan ang biktima ug misumbong sa iyang maguwang nga babaye ug ngadto sa ilang amahan.
Gi entrap ang suspek hangtud nga kini nadakpan ug pasakaan og kasong acts of lasciviousness. /MEL (BANAT NEWS)