CEBU, Philippines — Dul-an sa katunga sa populasyon sa Barangay Manipis, Dakbayan sa Talisay ang makatubig na gyud.
Kini human ang water system nga proyekto nahuman na.
Si kapitan Joselito Luarente nagkanayon nga kaniadto manghangyo sila sa kabomberorahan nga mahatdan sila og tubig nga magamit.
Apan gumikan sa bag-o lang nga nahuman nga proyekto deretso na sila og paagas sa tubig.
Ang Manipis usa kini sa mga bukirang barangay sa Dakbayan sa Talisay.
Matud ni Laurente nga 40 porsyento sa ilang populasyon maoy makabenepisyo sa bag-ong proyekto.
Ang pundo sa maong proyekto nga nikabat og P500 mil naggikan kini sa panudlanan sa siyudad pinaagi ni Mayor Gerald Anthony “Samsam” Gullas, Jr..
Si Gullas nipadayag sa iyang kalipay tungod kay dili na mahasol ang mga residente sa maong dapit kabahin sa tubig nga ilang magamit. (/BDB) (BANAT NEWS)