Upat nadakpan sa buy-bust operations

CEBU, Philippines —  Sikop ang usa ka 32-anyos nga lalaki human sa gipahigayon nga buy-bust operation sa may Sitio Freedom, Barangay T. Padilla ning Dakbayan sa Sugbo.

Ang nasikop naila nga si Stephen Edillon, alyas Bulldog, residente sa Sitio Bahaw, Barangay T. Padilla.

Nangulo sa maong operasyon mao si Police Major Efren Diaz Jr., station commander sa Pari-an Police Station uban sa mga Station Drug Enforcement Unit niini.

Nasakmit gikan sa maong dinakpan ang singko gramos nga gituohang shabu nga mobalor og P34 mil ug buy-bust money. Samang nadakpan sa laing susamang operasyon ang usa ka Arnold Booc, 33, ug kaubang si John Louie Saavedra, 29, sa mga sakop sa Presinto 5 sa Lapu-Lapu City Police Office.

Si Police Captain Noel Nalzaro miingon nga si Booc maoy ilang target sa operasyon, nakuhaan nila siya og 50 gramo nga gituohang shabu ug medium size usab nga paketeng gituohan sab nga shabu ang ilang nasakmit gikan ni  Saavedra.  Samtang nadakpan sab sa mga sakop sa City Intelligence Unit sa Mandaue City Police Office (MCPO) diha sa Sitio Nawanao sa Barangay Subangdaku sa Siyudad sa Mandaue sa miaging gabii si Ronilo Tecson, 40.

Nasakmit gikan sa maong dinakpan ang 8 gramo nga shabu nga mokabat sa P54 mil ang kantidad niini. — Rowena D. Capistrano, IBM (BANATNEWS)