CEBU, Philippines — Nakabaton og mga bag-ong pumpboats ang 100 ka mga mananagat sa Barangay Sabang sa Isla sa Olango sa Siyudad sa Lapu-Lapu hulip sa nangaguba nilang pumpboat tungod sa super typhoon Odette niadtong niadtong Disyembre 16, 2021.
Hinuon dili kini libre apan padata-datahan kini kanila sud sa tulo ka tuig sa Impact Circle Finance Philippines Inc. nga usa ka Japanese financial institution nga nagpasiugda sa "Ahon Para sa Nayon Program."
Pamaagi nila kini sa pagtabang sa mga mananagat nga nawad-an og kahimanan sa ilang panginabuhian sa nahisgotang lugar.
Ang data P95 matag adlaw o P3, 000 ang matag bulan. Ang maong pumpboats nga adunay gitas-on nga 20 ka tiil ug dunay 6.5 kabalyos nga makina, makadala kini og upat ka tawo. Didto kini gipagama sa Lungsod sa Socorro sa Lalawigan sa Surigao.
Si Mayor Junard "Ahong" Chan mitambong sa ceremonial turnover nga gipahigagyon niadtong miaging adlaw nagpa salamat sa mga nagdumala sa maong financial institution.
Gikalipay niya nga wala pangayoi og kolateral ang mga mananagat gawas lamang sa ilang dakong pagsalig sa mga mananagat nga Olango. (BANATNEWS)