Tinun-an sa nursing, wala magdahom nga pasidunggan

CEBU, Philippines — ‘Overwhelming’, kini maoy gibati sa mga nursing students sa University of Cebu Banilad Campus tungod sa simple nilang pagtabang sa nagkinahanglan daghan ang midayeg kanila.

Sila si Angyl Fayth Ababat ug Kristianne Joice Noelle Ona gumikan sa kadaghang recognitions nga ilang nadawat tungod sa ilang  pagluwas kang Bernadetta Zamora dihang gidunggab ang liog niini sa iyahang kapuyo nga si Edwin Lumacad kinsa napasakaan na og kaso sa kapulisan sa dakbayan sa Sugbo.  Si Ona miingon wala sila magtuo makadawat sila og daghang pasidungog gumikan sa ilahang pagtabang kay ang ilang gihuna-huna mao maluwas ang biktima.

“Grabe ka blessed kay we just help bitaw like it’s our intention to help pero wala gyud mi naka think nga ingon ang recognition ang among madawat so a big thank you sa pag recognize namo,” matud ni Ona.  We were told nga once okay na daw i-contact rami para maka-visit ni Nanay,” sigon ni Ababat bahin sa biktima kinsa nagpaalim pa sa tambalanan.

Gipahibawo sab nila bisitahon nila ang biktima nga sa tambalanan kun pwede na duawon. Sa flag raising ceremony sa Cebu City Police Office kagahapon sa buntag sa Camp Sotero Cabahug, Gorordo Avenue ning siyudad, gihatagan nila og plaque of recognition ug ingon man cash incentive.Giila sa CCPO ang bayanihong gihimo sa mga tinun-an kay nakatabang sila aron maluwas ang biktima sa pagpanunggab.

“Ang amoang gustong mensahe ipaabot ani sa katawhan, sa atong mga kababayan, kami as police officers, kami as policemen ang among role sa community is to serve and protect that is why gitagaan nato og recognition katong duha ka young women tungod sa ilahang good deeds nga nahimo nga maoy nakasalba sa kinabuhi sa atong kababayan,” asoy ni Police Col. Ireneo Dalogdog, City Director sa Cebu City Police Office (CCPO).

Samtang lakip sa gihatagan og pasidungog sa CCPO ang mga personnel sa Waterfront Police Station 3 nga dali sab nakahimo og aksyon sa maong insidente.

Gawas sa CCPO, si Cebu City Mayor Michael Rama gikatakda sab mohatag kanila og pasidungog ug dakong kahigayonan nga makatrabaho sa Cebu City Medical Center(CCMC) kun sila makahuman ug lisensiyado na.

“Why not?...Buhatan na daan ug pledge of commitment,” matud sa mayor Rama kinsa midugang nga mas maayo kun makagradwar ug magkalisensiya na sila samtang siya pay mayor hangtud tuig 2025.

Sa press conference ni Rama kagahapon, siya mibutyag nga maapil ang duha sa makadawat sa Mayor’s Award karong umaabot nga  Charter Day celebration sa Pebrero 24, 2023.

Tan-awon pa sab kun  unsa pay dugang mahatag para sa duha.

Human sa CCPO, giimbitar sab sa buhatan ni Konsehal Rey Gealon ang duha diin sila gihatagan og pahalipay apil ang sphygmomanometer ug stethoscopes gikan sa kaugalingong bulsa sa konsehal uban sa mga gamit sa balay ug sa eskuylahan.

Si Gealon midalit sab sa duha og full scholarship grants sa caregiving course –NCII gikan  sa St. James Academy,  food products gikan sa  KJB Merchandising ug   bouquet  gikan sa Reglins Flower Shop.

Gipasabot hinuon ni Gealon nga pwedeng ihatag sa duha ang caregiving course scholarship  ni bisan kinsang gusto nilang hatagan kun dili nila kini gamiton. — Caecent Noot Magsumbol, Rowena Capistrano (BANATNEWS)