HAPAG pormal na nga gilusad kagahapon

CEBU, Philippines — Pormal na nga gilusad kagahapon ang Halina’t Magtanim ng Prutas at Gulay (HAPAG) sa Barangay Project diin tumong niini ang pagbaton og igong  supply sa utanon, prutas, ug uban pa nga nag-unang pagkaon.

Nangulo sa nasudnong paglusad ang kalihim sa Department of Interior ang Local Government (DILG) Benhur Abalos.

Ang matag barangay kay gidasig nga mangita og bakanteng luna ug patamnan og mga prutas ug utanon.

Nagkanayon si Abalos nga dako kini og matabang sa inadlaw -adlaw nga kinahanglanon sa katawhan ilabi na sa mga bata. Tumong usab sa maong kalihokan nga mapataas ang kaamgohan sa mga hingtungdan ilabina ang mga barangay isip essential nga kaabag sa nasudnong kagamhanan sa pagsulbad sa food insecurity sa nasud pinaagi sa sub-sub ug pagpalambo sa mga kalihokan sa agrikultura sama sa barangay community gardening.

Gawas nga makaabag sa supply sa pagkaon nailhan na sa kadaghanan nga sustansiyado ang mga utanon ug prutas.

Sa Dakbayan sa Sugbo kanunay nga gidasig sa City Agriculture Department ang katawhan sa pagpananom diha sa ilang tugkaran. Gani adunay mga pamaagi sa pagpananom bisan kon gamay lang ang espasyo.

Gihingusgan sa Dakbayan sa Sugbo ang kampaniya sa urban gardening ug matud sa CAD nga gamit kaayo ang pagpananom sa mga tugkaran aron adunay maka-standby nga pagkaon sa panimalay. (BANATNEWS)