Clearing dunay pabor-pabor?

CEBU, Philippines — Duna ba'y “Holy Cows”  ang Dakbayan sa Sugbo ? Mao kini ang nagtangag nga pangutana ni Konsehal Pastor Jun Alcover  human dunay usa ka kan-anan diha sa Osmeña Boulevard eskina F. Gonzales Street, Brgy. Sto. Niño, Dakbayan sa Sugbo nga giingong dugay na nakadawat og "Notice of Illegal Construction"apan wala gihapoy aksyon nga napahamtang niini.

Sa privilege speech ni Alcover atol sa session sa Konseho sa niaging adlaw, iyahang nahisgotan nga niadtong Oktubre 14, 2020, ang Office of the Building Official pinaagi ni  Architect Florante Catalan kay niiendorso alang sa pagkuha og  legal opinion didto sa City Legal Office kalabot sa  renovation sa usa ka restaurant nga walay approved  building permit.

Base sa gipakita nga mga hulagway ni Alcover, makita nga  dunay tipik sa maong establisamento kay nakababag na sa sidewalk. Giingong mapugos og agi ang ang mga tawo sa agianan sa sakyanan gumikan sa nagbabag sa sidewalk.

"Architect Catalan pointed out that the said establishment violated P.D. 1096 or the National Building Code.

Gani, niadtong  Oktubre  4, 2019, ang  OBO nagpadala na diay of  Notice of Illegal Construction ngadto sa tag-iya niini tungod sa paglapas niini sa Section 301 sa  National Building Code.

"Dili man ko abogado ug dili pud ko Architect, maong ako nang itugyan sa atong mga experts aning butanga kung unsa ang mga teknikal na kalapasan sa maong lagda," matud pa sa konsehal.

Naobserbahan ni Alcover ang dakong kalahian sa dagkong negosyante ug mga ginagmay nga street vendors.

Matud pa niya  nga  dali ra kaayo dakpon sa Prevention, Restoration, Order, Beautification, and Enhancement (PROBE) ang street vendors nga nakalapas sa mga lagda, apan ang ubang dagkong negosyante nga  susama  sa gihisgotan niya nga kan-anan diha sa Osmeña Boulevard kay wala gihapo'y aksyon batok sa mga posibling kalapasan niini.

"It seems that there are some businessmen that glaringly defy the lawful orders and regulations imposed by Cebu City Government," matud pa ni Alcover.

Nipadangat og request si Alcover  sa Office of the Mayor pinaagi sa City Legal Office nga mohimo og tukmang aksyon  kalabot sa kalapasan sa maong kan-anan. (BANATNEWS)