Devotee city banhawon  sa dakbayan sa sugbo

CEBU, Philippines —  Gibutyag ni Konsehal Philip Zafra, chairman sa committee on peace and order sa konseho sa Siyudad sa Sugbo ug chairman sa Sinulog 2023 executive committee nga banhawon sa Kagamhanan sa Siyudad ang pagtukod og Devotee City alang sa umaabot nga Pista Senior karong 2023.

Gitataw niya nga padayon karon ang ilang tigum uban sa mangulo niini nga si Konsehal Francis Esparis aron masuta kun asang dapita tukoron ang Devotee City.

Naandan kini nga gipahimutang sa area nga duol sa Compania Maritima pipila ka lakang gikan sa Basilica Minore del Santo Niño.

Matag tuig naka-accommodate kini og liboan ka mga deboto nga walay kaestaran sa Dakbayan ug dili maka-afford sa pagpuyo diha sa mga pension house o hotel.

Libre ang accommodation niini diin ang mga debotos kinahanglan lang nga magpakita sa ilang bus o shipping ticket aron makasulod.

Sa laing bahin si konsehal Joel Garganera nakigtagbo sa mga operators og mga establisamento sama sa bar,  hotels restaurant ug malls  aron maseguro ang kaluwasan sa katawhan.

Kini sa tuyo nga magbutang og sayon nga kaagian sa katawhan ang maong mga bay patigayon panahon sa pagsaulog sa dakung kalihukan dinhi sa dakbayan ilabi na sa nagsingabot nga pista senyor.

Suma pa sa konsehal nga dunay mga kalihokan nga dagsaan sa mga tawo busa kinahanglan gyud nga dunay saktong pagpangandam ang mga operators sa mga establisamento.

Nasayran nga importante kaayo ang pag-umol og safety officer sa matag establisamento aron dunay maka-focus sa pagmonitor sa implementasyon sa protocols. (BANAT NEWS)