Manindahay daplin sa karsada gimanduan nga pasibogon
CEBU, Philippines — Gimanduan ang mga manindahay daplin sa karsada diha sa N. Bacalso Avenue nga habig sa Barangay Tabunok ug Bulacao nga pasibogon sa ilang estraktura ug hatagan og lugar ang mga tawo nga maglakaw.
Ang 50 ka manindahay nga maapektahan gipatawag sa City of Talisay-Traffic Operation Development Authority (CT-TODA) uban sa task force ug mga opisyales sa duha ka barangay.
Si Jonathan Tumulak, pangu sa CT-TODA nagkanayon nga ilang gihangyo ang manindahay nga mosibog og 1.5 metro gikan sa karsada.
Kinahanglan nga tumanon gilayon ang maong kamanduan tungod kay mopahigayon og random nga inspeksyon ang task force.
Ang padayon nga mosupak imbargohan sa ilang mga gitinda o estraktura nga wala kuhaa.
Suma pa ni Tumulak nga usa sa makapabara sa trapiko ang mga naninda kay diha naman moagi sa karsada ang mga tawo nga maoy makapahinay sa dagan sa trapiko.
Kaniadto gihimo ang clearing operation apan adunay pipila nga nibalik sa naandan hinungdan nga ila nasab nga himoan og operasyon. (BANAT NEWS)
- Latest
