Pagkubkob sa bukid sa barangay Guindarohan wala itugot sa Munisipyo

CEBU, Philippines — Wa gitugotan sa konseho sa lungsod sa Minglanilla ang aplikasyon sa pribadong kompaniya nga makapadayon sa ilang operasyon sa pagkubkob sa kabukiran sa sitio Napo, Barangay Guindaruhan.

Kini human padayon nga nagkadako ang liki sa kabukiran diin nahimutang ang panimay sa 23 ka mga residente.

Ang konseho nipagawas sa ilang resolusyon sa pagdili sa gipangayo sa pribadong kompaniya nga special waste disposal permit alang sa tukoron nga motor pool ug rehabilitation plan niadtong buwan sa Septiyembre.

Ang lugar gihulagway nga delikado sa mga molupyo gumikan sa paglihok sa yuta.

Si Atty. Junrie Bragat, municipal administrator sa Minglanilla nipadayag nga makapila na nga gibalik-balikan ang mga residenti sa lugar aron pabakwiton. Kini nonot sa gipagawas nga rekomendasyon sa Mines and Geosciences Bureau (MGB) human sila misusi sa lugar.

Nahimo tuod ang temporaryo nga pagbakwit sa dihang nasinati ang kusog nga ulan apan nibalik sila sa dihang mibalik nasab ang kainit.

Ang mga residenti sa dapit nibutyag nga lisod para nila nga mobakwit tungod kay wa silay kabalhinan ug wa silay kabutangan sa ilang mga hayopan. Sa pagkakaron padayon nga gimonitor sa munisipyo ang kabukiran sa sitio Napo, Barangay Guindaruhan. (BANATNEWS)