Kapitan sa Malubog nihangyo nga paagion sila sa Garaje

CEBU, Philippines — Nipadangat sa iyang hangyo ang kapitan sa Barangay Malubog Dennis Dabuco nga tugotan ang iyang tagi-barangay nga makaagi diha sa Sitio Garaje, Barangay Busay paingon sa patag imbes nga adto sa gihimong alternatibong rota.

Ang maong hangyo gipadangat ni Dabuco atol sa gihimong pagsusi sa mga sakop sa City City Disaster Risk Reduction Management Office (CCDRRMO) ug Mines Geosciences Bureau (MGB)-7 diha sa Busay ug Malubog sa niaging adlaw.

Base sa taho sa Cebu City Public Information Office nga ang kapitan nipadayag nga maglisod ang mga taga-Malubog tungod kay dili maayo ang kahimtang sa gihimong diversion road diin libaongon kini.

Nitumaw ang maong hangyo gumikan kay tingklase na ug dunay mga tawo nga magdala sa ilang mga baligyaon.

“Kahibawo baya ta ron mahal na kaayo atong krudo, gasoline mahal na, additional cost kaayo na sa atong mga tawo adto moagi (sa diversion) road kay layo-layo man sad siya, tuyok gyud”, pasabot ni Dabuco.

Nasayran nga gidid-an nga makaagi ang mga sakyanan gawas sa motorsiklo diha sa Sitio Garaje gumikan sa nahitabong pagdahili sa yuta niadtong Oktubre 29, 2022 nga niguba sa pipila ka mga balay.

Tipik sa pagpatuman niini  mao ang pagbantay sa mga sakop Cebu City Transportation Office ug kapolisan diha sa lugar aron  pabalikon sa agi ang mga sakyanan ug tudloan nga adto moagi sa diversion road.

Sayo pa, gibutyag sa MGB-7 nga dilikado pa kaayong paagian og mga sakyanan ang Garaje ilabina kadtong mga dagko tungod kay nabantayan gihapon ang nagpadayong paglihok sa yuta. (/BDB) (BANAT NEWS)