CEBU, Philippines — Dul-an 200 ka mga pamilya gikan sa unom ka mga lungsod sa Probinsya sa Sugbo ang gipabakwit tungod sa pagbaha ug pagdili sa yuta nunot sa pangusokuso sa bagyong Paeng kagahapon.
Base sa situation report sa Provincial Disaster Risk Reduction and Management Office (PDRRMO), 23 ka pamilya sa barangay Guindarohan ang napabakwit; 93 ka pamilya sa Carmen; 56 ka pamilya sa Sogod, 15 sa San Remigio ug upat sa Consolacion.
Sobra 500 pud ka pasahero ang na stranded sa mga pantalan sa Daanbantayan, Danao, Santander ug San Remigio.
Ang Asturias nakatala pud og pagbaha sa pipila ka bahin sa lungsod apil pud ang upat ka barangay sa Carmen — ang barangay Cogon West, Dawis Norte, Poblacion ug luyang; Barili; barangay Ibabao ug Poblacion sa Sogod; Minglanilla ug Pinamungajan.
Samtang aduna pud gitaho nga pagdahili sa yuta didto sa Purok Rose Barangay Tanibbang ug minor landslides sa Barangay Anapog, Binabag-daang ug Lut-od didto sa lungsod sa Pinamungajan; aduna pud landslide sa pipila ka bahin sa Danao ug upat ka barangay sa Consolacion ( Barangay Casili, Panas ug Pitogo). Sa pagsulat niining balita walay natala nga namatay ang PDRRMO lukop probinsya nunot sa pangusokuso ni Paeng. (BANET NEWS)