Mga armas gitahan ngadto sa kapolisan sa Danao

CEBU, Philippines — Pipila ka armas ug kagamitan sa paghimo niini ang giturn-over ni Kapitan Roderick Ramos sa Barangay Cahumayan, Dakbayan sa Danao niadtong Huwebes sa hapon.

Ang kapolisan sa siyudad mga alas 2:00 sa hapon sa maong adlaw nakadawat og taho kang Ramos nga duha sa iyang mga konstituwente ang boluntaryo nga motahan sa ilang pipila ka mga armas lakip ang mga hiraminta ug materiyales alang sa paghimo niini. Ang hepe sa Danao City Police Station Police Colonel Fortunato Ecle, Jr. uban sa iyang deputy chief Police Lieutenant Roel Tanza ang nangulo sa pag-adto sa lugar.

Ang kagamhanan sa siyudad nipasalig sa mga nitahan sa ilang armas nga hatagan og panginabuhian.

Ang gipang turn-over naglangkub sa duha ka semi-finished pistols nga wala mapiho ang kalibre; duha ka unit sa caliber .38 revolver; usa ka unit sa caliber .22 compact-size revolver; usa ka manual press machine; duha ka grinders; duha ka grip machine; 31 ka metal filers; ug mga hiraminta.

Ang maong boluntaryo nga pagtahan sa mga armas ug hiramintan gihangop kini sa kapolisan ug opisyales sa barangay ug padayon nga niawhag sa ubang mga naghupot ug manghimoay og armas nga makig-alayon sa programa sa kapolisan ug kagamhanan.

Sa laing bahin, usa ka suspetsadong pusher ang nasakmitan og armas ug shabu atol sa gipahigayong buy bust operation sa kapolisan sa Presinto 4  sa Lapu-Lapu City Police Office  sa niaging gabii diha sa Barangay Marigondon, Dakbayan sa Lapu-Lapu.

Si  Police   Major  Airbert  Jay  Samson,  hepe  sa kapolisan  sa Presinto 4 sa LLCPO niila sa suspetsado nga mao si Mitchleo Nuñez, 57-anyos, nagpuyo sa maong dapit.

Nasakmit sa mga polis gikan sa suspetsado ang kalibre .38 nga revolver nga adunay tulo ka buhing bala ug mga pakete  nga shabu nga nagkantidad tanang ngadto sa P27,000. — (/BDB) (BANAT NEWS)