Dalaga gitigbas sa liog patay

CEBU, Philippines — Usa dalaga ang gitigbas patay sa sud sa iyang balay diha sa Barangay Arbor, Lungsod sa Boljoon niadtong adlaw nga Martes ug ang suspek nadakpan sa hot pursuit operation sa kapolisan.

Ang biktima naila nga si Elsa Fernandez, 48, residente sa maong lugar. Samtang ang suspetsado naila nga si Jaime Pelone Jr, ug silingan sa biktima.

Ang suspetsado nadakpan kini pinaagi sa hot pursuit operations nga gipangulohan sa ilang hepe Police Lt. Charles Gomez.

Matud pa nga nag-inusarang nagpuyo sa balay ang biktima. Nadiskubrehan ang patay’ng lawas niini sa dihang usa sa mga barangay kagawad ang niduaw sa balay niini tungod kay wala kini mabantayi anang adlawa.

Gikatahong nahibulong ang kagawad kay sa pagsangpit niini ngadto sa ginang walay nitubag, nisamot ang iyang pagduda kay nakita nga nangatangtang na ang glass jalousy sa bintana sa likod nga bahin sa balay sa maong ginang.

Tungod niini nitawag sa kapolisan ang maong opisyal.

Sumala pa ni Police Corporal Arnel Payosan, Desk Officer sa Boljoon Police Station sa pagabot sa mga polis, nakita nila ang biktima nga patay na ug duna kini samad tinigbasan sa liog.

Ang kapulisan nihimo gilayon ug pakisusi ngadto sa mga barangay opisyal, kasilinganan ug kabanay sa biktima hangtud nga nitumaw ang pangalan sa suspek nga giingong nakalalis sa biktima sa nanglabay nga mga adlaw.

Dihang giadto sa balay sa suspek, wala kini didto ug dunay nakatug-an nga nakit-an kining nagdali-dali og lakaw ug padung sa highway kay nag-atang og masakyan padung sa Cebu City.

Ang suspek naabtan pa sa daplin sa karsada nga nagpaabot og masakyan hinungdan nga kini gidakop.

Nasakmit  gikan sa suspetsado ang t-shirt niini nga aduna pay dugo ug sa pag follow-up sa kapulisan na recover usab ang sundang nga gigamit sa krimen. (BANATNEWS)