CEBU, Philippines — Nangita na ang opisyales sa matag purok sa Siyudad sa Carcar sa ilang honorarium nga gigahin alang kanila.
Ang 15 ka kapitan sa siyudad nagkahiusa sa pagduso og resolusyon ngadto sa konseho aron mapaabot kini kang Mayor Patrick Barcenas.
Si kapitan Wilfredo Sabala sa Poblacion Ward III nibutyag nga nagkausa sila tanang kapitan sa pagpirma sa resolusyon diin giduso nila kini ngadto sa konseho aron mapaabot ang yangungo sa opisyales sa purok.
“Whereas, the purok officers had been rendering their services as such in their respective puroks since April to June 2022”, tipik sa resolusyon nga giduso sa konseho ni Association of Barangay Council President Anthony John Apura.
Matud ni Sabala nga gamay ra tuod ang honorarium sa opisyales sa purok apan kinahanglang mahatag kini. Nasayran nga ang niaging administrasyon sa siyudad nigahin og pundo alang sa maong katuyoan.
“Depende man sa bracket ang ilang madawat basta average naay P200 matag buwan ihatag na siya quarterly. Pero bisan unsa na ka gamay makatabang na kana sa tawo nga mihatag og serbisyo”, padayag ni Sabala.
Gibutyag ni Sabala nga giusab na karon ang ordinansa sa pagpili sa opisyales sa purok diin nagtuo siya nga politika ang motibo niini.
Ang Banat News nisuway sa pagkuha og habig ni Barcenas kabahin sa maong isyu pinaagi sa pagtawag sa telepono apan wa kini mo tubag.
Hinuon sa iyang tubag sa resolusyon nga gipadangat niadtong Oktubre 5, ning tuiga, iyang gipadayag nga ang iyang buhatan wala makadawat og dokumento sa pagproseso sa honorarium sa purok tungod kay ang buwan nga gihisgotan iyaha paman sa pagdumala sa niaging administrasyon.
Sa iyahang pakisusi sa buhatan ni Evelyn Dayanan, pangulo sa accounting department wala pa usab sila makadawat sa mga dokumento nga gikinahanglan aron mapagawas na ang honorarium sa opisyales sa purok.
Gipasalig ni Barcenas nga andam ang iyang buhatan sa komunikasyon ug hatagan nila kini og pagtagad ilabi na kong makasumite na og mga dokumento alang sa pag-release sa honorarium. — (/BDB) (BANAT NEWS)