CEBU, Philippines — Sabongero og manok nasikop sa gipahigayon nga buy-bust operation sa mga sakop sa Philippine Drug Enforcement Agency 7 niadtong Miyerkoles sa hapon didto sulod sa compound sa Grand Tejero Arena sa barangay Tejero siyudad sa Sugbo.
Ang nasikop giila nga si Marco Antonio Gungog 44 residente sa Dakbayan sa Mandaue.
Nakuha gikan sa iyang posisyon ang duha ka dagko nga putos sa gituhuang shabu nga gisulod sa plastic pouch nga motimbang og 100 gramos og mobalor sa P680, 000. Lakip sa nakuha ang gisakyan niini nga motorsiklo, buybust money nga P100, 000 ug cellphone.
Matud pa sa tigpamaba sa PDEA-7 Leia Alcantara nga duha ka bulan ang ilang pag monitor sa illegal nga kalihokan ni Gungob nga giingong maka dispose og usa ka kilo matag semana.
Sa dihang nahinabi sa Banat News, si Gungog mitug-an nga igo lang siya gisugo nga itunol kini ngadto sa usa ka babaye nga gika istorya sa anak sa usa ka kapitan sa barangay nga sakop sa Dakbayan sa Sugbo.
Samtang sa laing bahin usa ka lalake ang nakuhaan og 200 gramos sa gituhuang shabu nga mobalor og P1.3M atol sa checkpoint sa Parian Police Station kagahapon sa kadlawon.
Giila ang suspek nga si Rosalito Dinglasa Cañete Jr. residente sa siyudad sa Talisay.
Ang hepe sa Parian Police Station nga si Police Major Efren Diaz Jr. mitug-an nga atol sa ilang checkpoint atubangan sa ilang station miagi ang suspek nga walay helmet hinungdan nga ilang gipahunong.
Apan dihang gipangayuan sa iyang lisensya kalit lang gitukmod niini ang polis og midagan hinungdan nga ilang gigukod ug sa dihang ilang nadakpan ilang nakit-an ang belt bag niini nga dunay lima nga dagkong pakete sa gituhuang shabu ug nagkadaiyang drug paraphernalia. —/MEL (BANAT NEWS)