Developers gihangyo sa pagtukod og MRBs alang sa socialized housing

CEBU, Philippines — Giawhag sa mga opisyales sa Dakbayan sa Sugbo ang nagkadaiyang  developers sa nasud nga tabangan ang kagamhanan sa dakbayan sa pagtukod og medium-rise buildings (MRBs) alang sa socialized housing program niini.

Sila si Mayor Michael Rama ug Bise Mayor Raymond Alvin Garcia maoy nihimo sa panawagan atol sa panagtapok sa mga sakop sa Organization of Socialized and Economic Housing Developers of the Philippines (OSHDP) sa miaging adlaw.

Sa taho sa Cebu City Public Information Office, malaumon ang mayor nga ang ubang mga MRBs matukod sa siyudad diin ang mga developers motuman sa socialized housing law, sama sa gihimo sa Cebu Landmasters, Inc. nga nagtukod og duha ka MRBs sa Barangay Lorega-San Miguel.

“You are the answer to our Medium-Rise Building need that we would like to be in place in the City of Cebu…and we need your help. Will you accept to be part of it?” mensahe pa ni Rama ngadto sa developers.

Human makadawat og positibong tubag, ang mayor nihangyo kanila nga moduyog sa panglantaw ug tinguha sa iyang administrasyon nga masusama sa Singapore ang Dakbayan.

Si Garcia, sa iyang bahin, nitug-an sa mga developers nga mahimo nilang tukoron ang ilang socialized housing sa dakbayan, pinaagi sa pagtukod og MRBs, tungod kay 90 porsiyento sa mga molopyo dinhi naa sa urban areas.

Matud niya nga dako silag ikatabang sanglit liboan ka pamilya sa patag ang walay tarong nga pinuy-anan.

Dugang pa sa bise mayor nga siya mismo ang nakakita sa maong problema, isip chairman sa Committee on Housing sa City Council.

“The developers go to Cebu City, look at it as a very lucrative place for them to build condominiums or subdivisions, and then they need not care where they will comply with their socialized housing aspect,” nagkanayon si  Garcia.

Ang kagamhanan sa dakbayan nagplano nga magtukod ug dugang MRBs alang sa mga informal settlers, lakip niini ang mga pamilya nga maapektuhan sa pagpalambo sa waterfront area ingon man ang hugot nga pagpatuman sa three-meter easement alang sa mga agianan sa tubig. (BANAT NEWS)