Pag-regulate sa tartanilla sa siyudad gitun-an

CEBU, Philippines — Si Cebu City Councilor Pastor “Jun” Alcover, Jr. nisugyot og ordinansa nga mag-regulate sa operasyon sa mga tartanilla sa dakbayan.

Ang gisugyot nga lakang nga nag-ulohan og “Calesa sa Sugbo Ordinance” giduso ngadto sa Committee on Laws, Ordinances, and Styling sa konseho; Committee on Tourism, Arts, and Culture; ug Committee on Animal Welfare alang sa pag-review.

Aron mapatuman ang katuyoan niini, labing menos lima ka opisina ang gihatagan og tahas alang sa maong buluhaton.

Ang Department of Veterinary Medicine and Fisheries (DVMF) makig-alayon sa mga tag-iya sa kabayo ug "kutseros" sa pagpahigayon og mga seminar aron mapadayon ang pag-atiman sa mga kabayo o ubang kinahanglanon kalabot niini;

Lakip na ang Cebu City Transportation Office (CCTO) kinahanglang moila sa mga rota sa calesa nga nahisubay sa mga heritage sites ug sa mga tradisyonal nga rota niini; ug ang Cebu City Tourism Office mao ang nag-unang buhatan nga makig-alayon sa calesa sector, accredited tour guides, o uban pang organisasyon sa pagpasiugda sa programa sa turismo nga naglambigit sa mga heritage sites ug museu sa dakbayan. Ang Cebu City Treasurer's Office mao ang buhatan nga makadawat og bayad sa pag-isyu og permit ug ubang susamang transaksyon subay sa mga gimbuhaton niini ubos sa Local Government Code.

Nalatid sa section 4 sa ordinansa nga ang tanang tag-iya sa calesa kansang mga units nag-agi sa kadalanan sa dakbayan kinahanglang makakuha og permit to operate sa Cebu City Tourism Office.

Dugang pa, usa ka tinuig nga bayronon ang kolektahon alang sa pag-isyu ug alang sa permit to operate, P100; Permit-to-Operate-Sticker, P50; ug calesa plate number, P100.

Ang tanang kutseros kinahanglan makakuha og tinuig nga akreditasyon sa Cebu City Tourism Office.

Mahimo usab sila magsul-ob og puti nga mga kamiseta ug itom nga karsones, sapatos nga goma o tsinelas. —/MEL (BANAT NEWS)