CCDC niaproba sa P39.5 bilyones nga pundo alang sa AIP sa Cebu City

CEBU, Philippines — Nikabat ngadto sa P39.5 bilyones ang giaprobahan sa Cebu City Development Council (CCDC) nga pundo alang sa Annual Investment Plan (AIP) sa Dakbayan sa Sugbo alang sa tuig 2023.

Base sa report sa Public Information Office (PIO) sa siyudad giaprobahan sa CCDC ang managlahing mga resolusyon alang sa upat ka lain-laing sectoral committees ug sa ilang tagsa-tagsa ka mga programa, proyekto, ug mga kalihokan nga mga sugyot atol sa hingpit nga tigom niini sa niaging adlaw.

Gipangulohan kini ni Atty. Collin Rosell, executive secretary ni Mayor Michael Rama.

Nitambong sa maong tigom ang mga barangay kapitan, city government department heads ug office heads, ug mga representante sa regional government agencies, non-government organizations, ug people’s organizations.

Matud ni Rosell nga sa kinatibuk-an ang AIP mao ang paagi sa siyudad sa pagkonsulta sa katawhan ug pagtugot sa katawhan nga moapil sa proseso sa pag-budget.

Ang partikular nga  kantidad sa AIP niabot ngadto sa P39,527,716,042.51 diin P14.57 bilyones ang gigahin alang sa social sector, P12.83 bilyones alang sa institutional sector, P10.9 bilyones alang sa economic sector, ug P1.23 bilyones alang sa environment sector.

Gikan sa CCDC, kini iduso ngadto sa konseho sa dakbayan alang sa pag-aproba niini.

Ang AIP maoy magsilbi nga basehan sa paglakip sa gisugyot nga 2023 annual budget sa siyudad nga gipaabot nga isumite sa executive department ngadto sa konseho sa ulahing bahin niining buwana.

Pinaagi sa maong programa nangayo og suhistiyon ang dakbayan sa publiko kon unsa nga mga PPA ang angay nilang ipadayon ug ipatuman sa umaabot nga tuig.

“We all know the vision of our mayor is a Singapore-like Cebu City. That is not an easy vision to carry out. In going to that, we hope and pray that all of us will be representing the genuine concerns of the people”, matud ni Rosell. —/BDB (BANAT NEWS)