Frasco nangayo og suporta sa PCL

CEBU, Philippines — Nangayo og suporta si Tourism Secretary Christina Garcia Frasco sa Philippine Councilors League – Cebu Provincial Federation alang sa iyang mga programa .

Base Sa mensahe nga gibasa ni Tourism Undersecretary Ferdinand Jumapao atol sa selebrasyon sa PCL Week 2022  nga gipahigayon diha sa Waterfront Cebu City Hotel and Casino sa niaging adlaw gibutyag ni Frasco nga ang Department of Tourism motrabaho sa pito ka nag-unang tumong.

Naglakip kini sa pagpalambo sa imprastraktura sa turismo ug accessibility, pag-establisar og digital connectivity, pagpalambo sa kinatibuk-ang kasinatian sa turista, pagpaangay sa pagpalambo ug promosyon sa produkto sa turismo, diversification sa portfolio pinaagi sa usa ka multidimensional nga turismo, pag-maximize sa lokal nga turismo, ug pagpalig-on sa pagdumala sa turismo pinaagi sa hugot nga pakigtambayayong salocal government units ug stakeholders.

Nagkanayon si Frasco nga ang LGUs maoy mag-una sa pagsiguro sa epektibo nga pagpatuman sa mga polisiya sa regulasyon sa turismo aron mapadayon ang sumbanan sa mga serbisyo nga ilang gihatag sa mga turista.

Ang DOT ubos sa paggiya sa presidente nag-una sa pagpalig-on sa LGUs pinaagi sa patas nga tabang sa pagpalambo sa turismo ug pagpalig-on sa manpower capacity aron masiguro nga walay tourist destination nga mabiyaan.

Gihatagan usab ug gibug-aton ni Frasco nga karon ang hingpit nga panahon nga mahimong bahin sa pagtukod sa nasud nga adunay usa ka presidente kinsa naglantaw sa pagbag-o sa industriya sa turismo nga  usa ka haligi alang sa pagbawi sa ekonomiya.

Giawhag ni Frasco ang PCL-Cebu Provincial Federation nga gipangulohan ni Toledo City Councilor Ricardo Pepito sa pagtukod og lig-on nga mga relasyon, pagbinayloay og best practices ug pag-ila sa dugang mga lugar alang sa kolaborasyon. —/BDB (BANAT NEWS)