2 ka barangay sa Talisay gahi sa pagtuman sa clearing operation
CEBU, Philippines — Giangkon sa pangu sa anti-vending task force sa Dakbayan sa Talisay nga adunay duha ka barangay nga gahi sa pagtuman sa clearing operation.
Si Edwin Nierves, pangu sa Anti-Vending Task Force nibutyag nga sa pagsugod sa pag implementar sa memorandum circular sa Department of Interior and Local Government (DILG) ang barangay Tanke ug San Roque gyud ang ilang naproblemahan.
Kini tungod kay adunay mga tawo nga walay pagpakabana ug walay respeto sa direktiba sa nasudnong pangangamhanan.
Niadtong miaging semana, gihawanan na sa mamaligyaay ang gawas sa merkado sa Tabunok ug uban nga mga estraktura.
Gibalik nila ni Nierves ang San Roque ug Tanke aron sa paghawan sa mga estraktura nga nakalapas sa agianan sa tawo.
Samtang sila si Jonathan Tumulak, pangu sa City of Talisay-Traffic Operation Development Authority (CT-TODA) nihimo sab og pakisusi sa barangay Poblacion uban sa licensing office aron masiguro ang lugar sa mamaligyaay samtang nagsingabot ang kapistahan.
Nasabutan nga walay dayo nga mamaligyaay kundili ang mga Talisaynon lang ang gitugotan aron dili mabalda ang agianan sa mga sakyanan. —MEL (BANATNEWS)
- Latest
