Parilla: walay grupo nga migamit sa kabataan sa pagpakilimos

CEBU, Philippines — Gitug-an sa Deputy City Director sa Cebu City Police Office Lt. Col. Wilbert Parilla nga wala sila’y nadungog nga dunay grupo nga migamit sa mga bata aron sila manaygon sa mga jeep de pasaheroan o kaha manglimos sa kadalanan.

Suma ni Parilla ang Local Government Unit sa Cebu City maoy dunay dakong tahas sa pag-rescue niining mga libud-suroy nga makita sa kadalanan ilabi na karong nagsingabot ang pasko. Matud pa dunay task force nga nagtuyok-tuyok kada adlaw sa kadalanan sa dakbayan aron mo-rescue sa mga bata aron malikayan nga mabutang sa peligro ang ilahang kinabuhi.

“Ang problema man gud aning mga bata, sige lang og balik-balik, dili na sila mahadlok kay ganahan raman sad sila nga i-rescue sila kay pakaunon unya papaulion, because we don’t have the law nga mo punish nila”, ni Lt. Col. Parilla pa.

Subay niini ang peace and order committee sa Konseho sa dakbayan nagsige na og plano kun unsay mahimo aron mapugngan kining mga libud-suroy nga makita sa kadalanan sa Cebu City.

Gitataw ni Parilla nga dili lang kini trabaho sa PNP apan apil na sab ang ubang hingtungdang ahensiya aron maghimo og konkretong programa alang sa kabataan.— MEL (BANATNEWS)