Demolison bisa’g iya sa gobiyerno

CEBU, Philippines — Gisugdan na sa Dakbayan sa Sugbu ang gubat batok baha ug pagbuhi og balik sa mga dagkong sapa niini sugod kagahapong adlawa pinaagi sa pagpang-demolis sa mga estrakturang nakaali sa agianan sa tubig, bisan iya pa kini sa gobiyerno.

Si kanhi environment secretary Roy Cimatu wala magusik og panahon ug gisugdan dayon ang demolisyon. Unang gibungkag ang kongretong paril sa gobiyerno diha sa Pier 3 aron makasulod ang clearing team sa bukana sa Lahug River.

Sa sayo pa, si Cimatu miingon nga kinahanglang walay bisan unsang estraktura nga makababag sa mga tiglimpyo niini.

Si Cimatu maoy gitahasan ni Cebu City Mayor Michael Rama nga mahawanan ang mga kasapaan aron mahunong kining problema sab aha matag mobunok ang uwan.

Dili hunongon ang pagdemolis sa mga estraktura hangtud nga dili mohanoy og dagan ang tubig padung sa bukana niini.

Tungod sa dautang panahon kagahapon, dunay mga teams sa city disaster management office ang gi-deploy sa kabukiran diin adunay mga sapa aron mapasidan-an ang clearing teams sa mga sapa sa ubos kun dunay bul-og sa tubig padung sa ubos.

Gawas sa paril sa Pier 3, isunod sab ang paril diha sa Pier 2 ug gisusi na sab ang Cebu City Jail tungod kay ang hugaw niini padung sa Guadalupe River.

Matud pang Cimatu ang prayoridad karon mao ang mga estrakturang nakaali sa agianan sa tubig.

Daan nang nanawagan si Cimatu sa mga pribadong establisamento nga nasulod sa 3-meter easement zone nga boluntaryong kining demolison.

Karong adlawa magpadayon ang clearing ug demolition operation dungan sab sa International Coastal Clean-up sa Cebu City nga gipaabot salmutan og 10 mil ka mga tawo gikan sa nagkadaiyang ahensiya sa gobiyerno ug organisasyon sa siyudad.

Gusto sab ni Cimatu nga kubkobon ang mga sapa aron kini palawman ug palapdan.

Ang hawanan karong adlawa mao ang Mahiga River, Lahug River, Estero de Parian, Guadalupe River, Kinalumsan River, Cogon-Pardo River ug Bulacao River  ug ubang gagmay’ng sapa nga girekomendar sa organizers.

Matud pang Cimatu dako kaayo og responsibilidad ang mga barangay officials kun asa nagdagayday kining maong mga sapa, kinahanglan sila manguna sa kampanya.

Si Colonel Wilbert Parilla sa Cebu City Police Office miingon nga mopadala sila og mga sakop aron motabang sa clean-up operation karong adlawa. — /IBM (BANAT NEWS)